7 მარტს ათენში სასტუმრო king george palace-ში F-ჯგუფის წარმომადგენელთა შეხვედრა გაიმართა. საქართველოდან მოლაპარაკებას ნაკრების თავკაცი თემურ ქეცბაია და მეორე მწვრთნელი სოსო ჭედია ესწრებოდნენ.

საბოლოოდ, კომპრომისული ვარიანტის გამონახვა ვერ მოხერხდა და ჩვენი ჯგუფის კალენდარს 23 მარტამდე უეფა დაადგენს. საქართველოს, ხორვატიის, საბერძნეთის, ისრაელის, ლატვიის და მალტის დელეგატების ბჭობა ამაო გამოდგა.

იმის შანსი, რომ კალენდარზე შეთანხმება მოხერხდებოდა თავიდანვე მცირე იყო, რადგან საკუთარი ვარინტის გატანა ყველას სურდა. მოლაპარაკების დასრულების შემდეგ ხორვატიის ნაკრების თავკაცმა სლავენ ბილიჩმა ასეთი კომენტარი გააკეთა:" შეთანხმების მიღწევა ვერ მოხერხდა, თუმცა ამის გამო გაწბილებული სულაც არ ვარ. იმედი მაქვს, უეფა ჩვენთვის ცუდ კალენდარს არ დაადგენს".

თავის მხრივ ლატვიის ფეხბურთის ფედერაციის ვებ-გვერდს უწერია, რომ მოლაპარაკება 4 საათს გაგრძელდა და შეთანხმებას ხორვატიის დელეგატთა უარის გამო ვერ მიაღწიეს. მათ ბოლ ტურში ისრაელში თამაში არ სურდათ. ხორვატების კალენდარი კი ბერძნებმა დაიწუნეს.