12 მარტს საქართველოს პრეზიდენტმა მიხეილ სააკაშვილმა დუშეთში ოლიმპიური მზადების ცენტრი და ოლიმპიური სახლი გახსნა, სადაც მოსამზადებელი შეკრებების დროს სპორტსმენები იცხოვრებენ. პრეზიდენტს დუშეთში სპორტის დეპარტამენტის თავმჯდომარე დავით ნამგალაური, ოლიმპიური კომიტეტის პრეზიდენტი გია ნაცვლიშვილი, პარლამენტის სპორტისა და ახალგაზრდობის საქმეთა კომიტეტის თავმჯდომარე გიორგი ასანიძე და სხვადასხვა სპორტული ფედერაციების პრეზიდენტები დახვდნენ.
რაც მთავარია, ოლიმპიური მზადების ცენტრი საკმაოდ კომფორტულია და ყველანაირი პირობაა შექმნილი, რომ სხვადასხვა სპორტის სახეობის ნაკრებებმა სათანადოდ ივარჯიშონ. გარდა ამისა, ცენტრში სამუშაოები ახლაც მიმდინარეობს. მალე იქ ფეხბურთის და რაგბის მოედნები, აგრეთვე ძალოსნებისთვის დარბაზი გაკეთდება. ასევე გაიხსნება ტირიც. ამ ყველაფრის მაკეტი უკვე გაკეთებულია და სამუშაოებიც მიმდინარეობს.
ოლიმპიური ბაზა, რომელიც პრეზიდენტმა გახსნა ქართველი სპორტსმენების მოსამზადებელი ადგილი გახდება. დუშეთში უკვე დაასრულა მომზადება მოკრივეთა ნაკრებმა. ამჟამად შეკრებაზეა თავისუფალი სტილით მოჭიდავეთა ნაკრები, მალე კი მათ ბერძნულ-რომაული სტილით მოჭიდავეთა ნაკრებიც შეუერთდება. უახლოეს პერიოდში დუშეთში დაიწყებენ ვარჯიშს საქართველოს ძიუდოისტთა ნაკრების წევრებიც.
მიხეილ სააკაშვილი:" ჩვენ ორი წლის წინ მივიღეთ გადაწყვეტილება, რომ დუშეთში ოლიმპიური მზადების ცენრტი გაგვეხსნა. თბილისი ვითარდება როგორც არასდროს, გარდა ამისა მნიშვნელოვანია რომ რეგიონებიც განვითარდეს. დუშეთის მოსახლეობას დასაქმების საშუალება მიეცემა. ბევრი ფიქრის შემდეგ გადავწყვიტეთ, რომ გაგვეხსნა ოლიმპიური ცენრტი, რომელიც იქნებოდა თბილისთან ახლოს თუმცა იზოლირებულ მდგომარეობაში.
აქ სპორტული ტრადიციები არსებობს ნახეთ თუ როგორი მაგარი დარბაზი გავხსენით. სასტუმრო გაიხსნა, აშენდა რამდენიმე სპორტული დარბაზი. თუ ხალხას ფუნქცია არ გაუჩნდა ხალხის დაცლა...
გაგრძელდება, ამიტომ ოლიმპიური მზადების ცენტრის გახსნა გადავწყვიტეთ და საქმე სისრულეშიც მოვიყვანეთ".
დავით ნამგალაური:" დუშეთის ოლიმპიურ ცენტრში სხვადასხვა ეროვნული ნაკრებები ახლაც ვარჯიშობენ. თუმცა, პარალელურად სამუშაოები მიმდინარეობს და ცენტრს მალე ფეხბურთის და რაგბის მოედანი შეემატება. ასევე გაიხსნება ძალოსანთა დარბაზი და ტირი, რაც ქართველ სპორტსმენებს მომზადებაში დახმარებას გაუწევს. კომპლექსმა იმდენად დიდი ფუნქცია შეიძინა, რომ საჭირო გახდა დამატებით სასტუმრო კომპლექსის დამატება, რომლის პრეზენტაციაც თქვენ უკვე ნახეთ".
ფოტო: თამუნა ყულუმბეგაშვილი
